Една од најголемите вистински љубовни приказни наскоро на филм
Кетрин Хепберн и Спенсер Трејси се синоним за забранета љубов.
Дали животната приказна на легендарната холивудска двојка наскоро ќе биде пренесена на големото платно?
Иако веста не е официјално потврдена, низ таблоидите се зборува за овековечување на една од најголемите љубовни приказни во историјата на Холивуд.
Кетрин Хепберн и Спенсер Трејси се запознаа во студиото MGM во 1942 година, на снимањето на филмот „Жена на годината”, се вљубија и останаа заедно сè до смртта на Спенсер, 1967.
Нивната љубовна приказна остана јавна тајна и никогаш не се круниса со брак, бидејќи славниот актер веќе беше оженет кога ја запозна Кетрин, а поради религиски убедувања не сакаше да се разведе.
Иако тајна, нивната љубов беше многу искрена и силна, љубов каква ретко се среќава кај славните.
Кога станува збор за славата, Спенсер Трејси се смета за една од најголемите легенди на Холивуд, актер кој 9 пати бил номиниран за Оскар, а златната статуетка ја освоил два пати. Меѓу неговите легендарни улоги е и онаа на стариот рибар од филмот снимен според делото на Хемингвеј „Старецот и морето”.
Кетрин Хепберн е уште една холивудска легенда, дама која во кариерата освоила 4 Оскари, а Американскиот филмски институт ја прогласи за најдобрата актерка на сите времиња.
Како холивудска двојка Кетрин и Спенсер заедно снимија 9 филмови.
Продуцентите сè уште размислуваат за изборот на актерската екипа и режисерот, но се чини дека приказната за тајната љубовна романса е сè поизвесна.
Погледнете дел од „Жена на годината”, филм на чие снимање се роди љубовта која ги пратеше до крајот на животот.
Додади коментар