Ако за еден град може да се рече дека е најсветото место во светот, тоа секако е Ерусалим, најсветиот град на јудаизмот, третиот најсвет град во исламот и свет град за христијанството.

Основан во 4 век п.н.е. Ерусалим е еден од најстарите градови во светот, место каде од Земјата се оди кон небото.

Во минатото во Ерусалим се влегувало низ Златната порта, и токму низ оваа порта Исус прв пат влегол во градот. Во 1541 година, султанот Сулејман Величествениот ја запечатил оваа порта која и денес е затворена.

Оние кои го посетиле Ерусалим сигурно поминале по Виа Долороса, т.н. Пат на Страдањето по кој некогаш чекорел Исус од местото каде бил осуден па сè до местото каде бил распнат на крстот. Верниците кои чекорат по овој пат симболично го претставуваат страдањето на Исус.

Ерусалим, лулката на духовноста, е дом и на Црквата на Светиот Гроб, изградена на местото каде се верува дека Исус бил распнат.

Над Ерусалим мирно почива Маслиновата Гора, свето место за христијаните и муслиманите. Токму овде се наоѓаат гробот на Мајката Божја, Црквата на Марија Магдалена и Гетсиманската градина – местото каде Исус честопати се молел и каде ги поминал последните часови од животот.

Црквата во која е сместен гробот на Мајката Божја

Црквата на Марија Магдалена

Црквата на сите нации – се верува дека токму на ова место Исус се молел пред да биде уапсен

Гетсиманската градина

Планината Сион е уште едно во низата свети места. Се верува дека токму овде било местото на Тајната вечера, а верниците може да го посетат и гробот на Давид, иако гробницата е празна бидејќи телото на Давид било погребано на друга локација.

Ерусалим е дом и на Ѕидот на плачот, свето место за евреите кои овде доаѓаат да се молат. Во пукнатините на ѕидот ги оставаат напишаните молитви и желби, бидејќи веруваат дека молитвите пред Ѕидот на плачот одат директно до Бог.

Овој ѕид е дел од некогашниот храм на кралот Соломон, а покрај евреите, и муслиманите го сметаат за свето место.
Од едната страна на ѕидот се издига џамијата Ал Акса, место на кое воскреснал пророкот на муслиманите,  Мухамед.

На 10 километри јужно од Ерусалим е Витлеем, уште едно свето место кое зрачи со мир и духовност. Во 339 година во Витлеем била подигната црква токму на местото каде се верува дека се родил Исус Христос.

Ѕвездата на Витлеем го покажува местото на кое се родил Исус

Ерусалим, домот на три религии, несомнено е многу блиску до небото, бидејќи токму овде ќе бидете сведоци на сопственото духовно издигнување, ќе најдете мир и ќе се доближите до Бог. Овој град на духовноста ќе ве поттикне да ги почитувате туѓите религии, бидејќи без оглед дали сте муслиман, евреин или христијанин, духовноста и вербата во бога се исти за сите.