Мистеријата на Египет скриена во пирамидите и Сфингата се чини дека никогаш нема да биде целосно разрешена.

Древните египетски градби се постојан предизвик за научниците кои при своите истражувања секогаш наидуваат на нови откритија и делчиња од мозаикот на мистеријата.

Една од загатките пред која се најдоа група истражувачи е поврзана со Сфингата, величествената градба со тело на лав и глава на човек.

Теоријата која ја поставија овие научници е можноста дека главата на Сфингата во минатото имала друг облик, поточно глава на лав, а не глава на човек. Многу подоцна, од досега непознати причини, првобитната глава била заменета со онаа која постои и денес.

Како научниците ја поткрепуваат оваа теорија?

Набљудувајќи ја Сфингата, не може а да не се запрашате зошто постои таква несразмерност во големината на телото и главата. Главата на Сфингата е премногу мала за масивното тело, а Египјаните биле такви мајстори за пропорции и работа со камен, што се исклучува можноста дека малата глава е резултат на грешка.

Вториот доказ за теоријата е самиот камен од кој е направена Сфингата. Високо издигната глава би требало да е пооштетена од телото, бидејќи е повеќе изложена на ветер и сонце, но нема сомнеж дека камената глава е далеку позачувана од телото на Сфингата.

Научниците се враќаат назад низ историјата, во времето на изградбата на Сфингата, кога лавот бил најценето животно, еден од најважните симболи кој се среќавал насекаде, дури и кај троновите и креветите на фараоните.

Дали и Сфингата првобитно имала тело на лав?

Колин Ридер, еден од носителите на теоријата и истакнат проучувач на древниот Египет, пронашол интересен цртеж на лав изгравиран на голем камен. Цртежот датира од времето пред изградбата на пирамидите, всушност од времето на Сфингата, бидејќи добро е познато дека таа е постара од пирамидите.
На каменот било изгравирано и име на фараон, со што уште еднаш се потврдува силната симболика и значењето на лавот за Египјаните.

Споредувајќи го цртежот со Сфингата, Ридер укажува на неверојатната сличност, со една разлика – главата.

Во обид да ја докаже својата теорија, Ридер нè води до музејот во Каиро каде се наоѓа најстарата статуа на Сфинга пронајдена досега.

На оваа статуа јасно се гледа дека некогаш имало камени делови во облик на уши, кои од некоја причина подоцна биле отстранети. Оштетувања има и во делот на вратот, со што се потврдува мислењето дека првобитната глава на лав била изменета за да добие човечки облик.

Доколку теоријата на Ридер е точна, не може а да не се запрашаме зошто Египјаните би вложиле толку труд и време за да ги заменат првобитните глави на сите статуи на Сфинги.

Која и да е вистината за првобитниот изглед на Сфингата, нејзино постоење е мистерија сама за себе.