Најубавото место во светот
Неговите староседелци, Маорите, го нарекуваат Aotearoa или Земјата на долгиот бел облак. За нас е познат како Нов Зеланд, остров на југозападниот дел од Пацификот.
Локалните жители, туристите, фотографите од целиот свет и сите оние кои ја посетиле, тврдат дека Нов Зеланд е најубавата земја во светот.
Ве покануваме на прошетка низ земјата која плени со прекрасните пејзажи и глетки кои го одземаат здивот.
Матамата
Оние кои го гледале култниот филм „Господарот на прстените”, сигурно се запрашале каде се снимени сцените од земјата на Хобитите. Матамата е делот од Нов Зеланд каде природата создала таква убавина што не може да се опише со зборови.
Матамата е дом на Хобитон, направен за потребите на филмот, место каде се сместени малите слатки куќички на Хобитите. Самото место делува толку волшебно, што ќе имате впечаток дека Хобитите навистина постојат и весело чекорат по Матамата.
Фјордленд
Националниот парк Фјордленд е чудесен дом на дождовни шуми, водопади и фјордови – длабоки и тесни заливи.
Природата која се рефлектира од водата создава пејзажи со чудесна убавина, и токму овде ќе бидете сведоци на сплотеноста на земјата и водата.
Роторуа
Чудесното место на гејзери, термални води, прекрасни зелени езера и водопади е една од главните туристички дестинации во Нов Зеланд.
Единствено овде ќе бидете сведоци на најубавото виножито во светот и ќе уживате во убавината на 16 езера формирани од вулкански кратери.
Абел Тасман
Националниот парк Абел Тасман е уште една од многуте атракции во Нов Зеланд. Познат по прекрасните плажи и карпата Разделено јаболко, паркот е вистински рај за туристите и љубителите на природата.
Заливот на Островите
На оние со авантуристички дух на располагање им се 150 мали острови, сместени во Заливот на Островите. Секој од нив нуди можност за истражување и уживање на некоја од плажите.
Полуостровот Коромендел
Прекрасниот полуостров се наоѓа на околу 2 часа возење од Аукленд –најголемиот град во Нов Зеланд.
Коромендел е дом на најубавите плажи во Нов Зеланд, меѓу кои е и термалната плажа Hot Water Beach.
По оваа прекрасна прошетка, сигурно ќе се согласите дека Нов Зеланд е чудесна земја, место каде природата го покажала сиот свој раскош и убавина и заслужено ја нарекуваат најубавата земја во светот.
Коментари [1]
suzanaVOSHITUVACKI
Додади коментар