Позитива, Поучни приказни

Не угодувајте му на никого

21 август, 03:02

Некој човек поминувајќи низ градот, јавајќи си го магарето, си одел кон својот дом. Неговиот син кој имал десет години, пешки одел покрај него. 
Ги сретнала некоја жена која им рекла:

- Ова вака не е во ред човеку, како може ти да го јаваш магарето, а твојот син да оди пешки, зарем не знаеш дека твоите нозе се посилни од неговите?

Кога ја слушнал човекот, веднаш слегол од магарето, а неговиот син го седнал на него за тој да го јава. Само што направил неколку чекори, ги сретнал некој човек кој им рекол:

- Младо момче, не е убаво ти да го јаваш магарето, а твојот татко кој веќе е стар и изморен да оди пешки покрај тебе. Твоите нозе се помлади од неговите.

Кога слушнал таткото што им зборува човекот, решил и тој да се качи на магарето, па така двајцата го јавале магарето и продолжиле понатаму по патот. По извесно време ги сретнал некој друг човек кој гласно промрморил:

- Каква е оваа будалштина, две магариња се качиле на едно слабо животно. Некој треба да ве натепа за да ви дојде умот за да ви текне дека премногу му тежите на кутрото магаре. Веднаш треба да слезете од него.

Таткото и синот во истиот момент се симнале од магарето и продолжиле да одат пешки покрај него, таткото од едната, а синот од другата страна на магарето, но по патот ги сретнал друг човек кој им рекол:

- Ама сте чудни сите тројца. Не можам да ви се изначудам зошто барем еден од вас не го јавне магарето за да не оди пешки?

Кога слушнал што зборува овој човек, таткото му рекол на синот:

- До сега и јас и ти го јававме магарето, сега најверојатно магарето треба да не јава нас.

Двајцата го легнале магарето на земја, му ги врзале предните и задните нозе со јаже, го врзале на голема гранка, го кренале и така врзано го носеле магарето на нивните рамена. 
Одејќи така со магарето на рамената, луѓето кои ги гледале им се чуделе на нивната постапка и гласно им се смееле. Кога го слушнал нивното зајадливо смеење, таткото го спуштил магарето на земја, го одврзал и рекол:

- Јас изгледа сум полуд од ова магаре бидејќи сакам на целиот свет да му угодам. Од сега со своето магаре ќе правам она што јас сакам да правам, тоа што мене ми е по ќеф, а луѓето нека зборуваат што си сакаат. Повеќе не се грижам за нив и за нивното мислење.

И така таткото повторно, но овој пат многу повеќе самоуверено го јавнал магарето, а синот продолжил пешки да оди покрај него.

Си го продолжиле нивниот пат без да им е грижа дали некој повторно ќе им кажува како и што да прават.


Ова важи за секој од нас, секој треба да си прави тоа што му е по ќеф и тоа што сака да си прави, без притоа да му е грижа дали некој друг човек отстрана ќе има некаква забелешка за неговата постапка.

Пробајте во иднина во вашите животи колку што можете повеќе да ја применувате оваа поука, верувајте сѐ ќе ви биде многу полесно и поедноставно.


автор: Jakimova Jasmina

Оваа вест е прочитана 2872 пати.

Коментари [0]

Додади коментар


Безбедносен Код:
Security Image  Освежи

Коментар


НА ДЕНЕШЕН ДЕН

28 Март

28 Март

Во 1986 година во Њујорк е родена Стефани Џоан Ангелина или позната за светската јавност како Лејди Гага. 

© 2024 МОЈ ПОРТАЛ  Сите права се заштитени.   изработено од Асидус