Не смееме да јадеме сладолед во зима? Кој тоа го вели???

Какво и да е времето, топло или ладно, нашата мила, слатка душичка може да посака некакво освежување. Наредба си е наредба, па ние како покорни слуги ѝ принесуваме чиста водичка или убав сладок сок, или пак некое овошје. Но зошто тоа да не биде некое слатко ладно задоволство. Асоцијација за такво нешто што може да биде освен сладолед.
Вообичаено сме навикнати сладоледот да го правиме со млеко или со јајца, или што знам, состојки кои па баш и не спаѓаат во онаа здрава храна. Затоа мојот рецепт за сладолед ќе биде целосно во категоријата на здрава храна.

Што ви треба за него:

- 2 шолји млеко од бадем (можете да го набавите како готово, но можете многу лесно да го направите и сами. КАКО???..Лесно...Ви треба само 1 шолја бадеми да ставите во подлабок сад, да ги потопите со вода и да ги оставите преку ноќ најмалку 8 часа да отстојат, а потоа утрото ќе ги процедите и добро ќе ги исушите, а може и лушпите да ги извадите онолку колку се лупат сами. Потоа ги ставате бадемите во блендер - 1 шолја бадеми : 3 шолји вода-  и ги блендирате добро. Изблендираните бадеми ги процедувате низ ситна цедилка. Од добиеното бадемово млеко оставате 2 шолји, а останатото слободно ставете го во фрижидер за следна друга употреба - се прават убави  комбинации со овошје)
- 1/4 шолја овесно брашно или овесни трици или снегулки
- 1/2 шолја какао во прав
- 3/4 шолја кокосов шеќер, но ако го немате може кафеав шеќер
- 1/4 шолја + 2 супени лажици сусамов таан
- 2 лажички за чај ванилин екстракт или ванилин шеќер
- 2 супени лажици јаворов сируп
- 2 супени лажици путер од какао - но ако го немате може да се замени со путер од кикири 
- 1/4 лажичка за чај сол

Подготвување:
Во блендер ставете го бадемовото млеко и овесното брашно и 10 мин. добро изблендирајте. Потоа додадете ги другите состојки, продолжете со блендирање сè додека сè добро не се соедини и не стане фина креместа маса. Потоа истурете ја смесата во сад кој ќе го ставите во фрижидер 1-2 часа.
Кога ќе го сервирате, комбинирајте  го со темно чоколадо (75% какао).
Оваа мера е доволна за 4 порции со сладолед.

И ЗОШТО ЈАС СЕГА ДА ВИ ГО РАСИПУВАМ АПЕТИТОТ И УЖИВАЊЕТО СО ТОА ШТО ЌЕ ВИ КАЖУВАМ ЗОШТО Е ОВА ЗДРАВ ДЕСЕРТ ( А ТОА И ОНАКА ГО НАУЧИВТЕ КОГА ПИШУВАВМЕ ЗА НУТРИТИВИТЕ НА КАКАОТО ). ЕДНОСТАВНО УЖИВАЈТЕ ВО ВАШИОТ ДЕСЕРТ КАКО МЕНЕ ЗОШТО ТОА Е ЕДЕН ОД МОИТЕ ОМИЛЕНИ ДЕСЕРТИ... КОЈЗНАЕ, МОЖЕБИ ЌЕ СТАНЕ И ВАША МИНУТА ЗА СЛАТКО ЗАДОВОЛСТВО????