Убав дом
Есента во вашиот дом – креативни декорации
Нова Година, Божиќ и Велигден се празниците за кои го декорираме домот со најразлични украси. Од ѕвончиња, панделки, лампиони, до велигденски зајачиња, и цветови, сè е во духот на празниците и празничната атмосфера, но и во духот на зимата и пролетта.
Сте помислиле ли некогаш да ја внесете есента во вашиот дом?
Есента е најшареното годишно време, сигурно и најубавото кога боите се во прашање. Можеби не ги сакате облачните денови и дождовните капки, но боите на есента едноставно не може, а да не ги обожавате.
Убав дом е оној кој е уреден со љубов. Не е важно дали мебелот е нов и модерен, важен е вашиот однос кон предметите, како и креативноста и љубовта кои ги внесувате при уредувањето.
Без некоја посебна причина, само за ваше задоволство, разубавете го домот со едноставни, но толку убави есенски декорации кои ќе внесат топлина и пријатност. Покажете ја својата креативност и дневната соба украсете ја во боите на есента.
Сè што ви е потребно се неколку есенски лисја, свеќи, есенско овошје, некое лешниче и оревче, желади, стапчиња цимет..., сè што имате дома или сте го нашле при прошетката во паркот.
Со малку љубов и трпение може да направите прекрасни декорации кои ќе ви мамат насмевка секогаш кога ќе ги погледнете.
Уживајте во боите на есента!
Додади коментар