Здравје
Знаеме ли сѐ за шипката?
Шипката е диво овошје кое расте во трнливи грмушки.
Во народната медицина се употребувало уште пред многу години бидејќи луѓето уште тогаш знаеле за неговите лековити својства.
Иако шипката е препорачливо да се пие како чај, или да се консумира како свежо овошје во есен и во зима, може да се консумира и во овој дел од годината кога времето знае да биде ептен променливо, бидејќи покрај останатите лековити својства, шипката првенствено влијае врз подобрување на имунолошкиот систем.
Но зошто токму шипката е кралицата помеѓу овошјата и спаѓа во групата на природни мултивитамини?
Шипката претставува богат антиоксиданс, изобилува со витамини и тоа најмногу со витамин Ц, потоа витамини П, Б12, Б2, Б1, К, А, како и натриум, јаболкова и лимонска киселина, природен шеќер, етерични масла, пектин, ванилин, танин, протеини, растителни влакна, минерали и многу други корисни состојки.
Со еден збор кажано шипката претставува „природна витаминска бомба” за организмот затоа што го подобрува во секаква смисла на зборот.
Но како и со консумирањето на сите останати природни тревки и плодови, така и со шипката не треба да се претерува затоа што може да предизвика сосема спротивни и непосакувани ефекти по здравјето.
Треба да се пие и јаде во умерени количини.
За што сѐ може да ви помогне шипката?
Шипката благопријатно влијае врз системот за варење, одлична е во лечењето на многу болести, а незаменлива е кога се консумира превентивно.
Ако чајот од шипка се пие редовно и во умерени количини, во голема мера ќе бидат задоволени потребите на организмот за витамин Ц.
Шипката подготвена како чај исто така помага и за:
- намалување на слободните радикали во организмот, со што се намалуваат шансите за заболување од рак;
- ги чисти дишните патишта и го олеснува дишењето;
- го чисти шлајмот од дишните патишта;
- помага при инфекција на мочните канали;
- спречува настинка и други вирусни инфекции;
- го спречува стареењето на клетките и ги обновува истите;
- го стимулира мокрењето;
- штити од кардиоваскуларни болести;
- ја подобрува циркулацијата;
- ја прочистува крвта;
- помага при мачнини;
- благо го намалува покачениот крвен притисок;
- помага за исфрлање на камчиња од бубрезите и мочниот меур;
- многу позитивно делува на коските, мускулите и кожата;
- одлична е против реума;
- ги намалува болките предизвикани од заболени или расипани заби;
- помага при детоксикација на организмот;
- го намалува стресот и смирува;
- го подобрува имунитетот;
- зајакнува, освежува и ја зголемува енергијата;
- ги намалува болките во желудникот;
- го нормализира менструалниот циклус;
- помага при лечење на хемороиди;
- ја смирува кашлицата;
- помага при лечење на акни, изгореници и лузни;
- ги намалува брчките и ја подмладува кожата;
- ги ублажува болките предизвикани од артритис;
- го намалува покачениот холестерол.
Благодатите од шипката се огромни и поради нив токму таа - шипката е незаменлива овошка.
Може да се консумира како свежо овошје, а може да се консумира и како чај и тоа приготвен од свежи или од суви плодови.
Како да подготвите чај од шипка кој ќе ги задржи сите хранливи и лековити состојки?
Во 1 литар вода ставете 200 до 300 грама суви или свежи плодови од шипка. Оставете ја водата на оган додека да зоврие. Откако ќе зоврие тргнете го садот од оган и течноста оставете ја да стои неколку часови или цела ноќ.
Наредниот ден омекнатите плодови издробете ги со виљушка или испасирајте ги со блендер и вратете ги повторно во течноста. Ако има потреба додадете уште малку вода и садот ставете го повторно на оган додека да зоврие. Потоа тргнете го од огнот, оставете го да се олади, процедете го и во умерени количини пијте го во текот на денот.
Чајот може да се заслади со мед или да се додаде цимет и лимон, но најдобро е да се пие без никакви додатоци бидејќи е многу вкусен и без нив.
Важно е да се спомне дека чај од шипка треба да пијат доилките, затоа што преку млекото витаминот Ц стигнува до бебето кое благодарение на него ќе биде поздраво и отпорно на настинки и други вирусни инфекции.
Додади коментар