Со традиционалното читање на неповторливата „Т’га за југ” од Константин Миладинов, денес во Струга, пред Центарот за култура ќе започнат 51-те „Струшки вечери на поезијата”.

На една од најголемите поетски манифестации во светот, која се одржува во Струга, ќе учествуваат околу шеесетина домашни и исто толку странски поети. Своето присуство досега го имаат потврдено поетите од: Франција, Индија, Куба, Ирак, Азербејџан, Мароко, Сирија и од многу други држави.

Учесниците на овогодинешниот фестивал ќе имаат можност и да се запознаат со културата и традицијата на нашата држава, посетувајќи повеќе наши градови.

На фестивалот, помеѓу другите награди, се доделуваат и најголемото признание за целокупна поетска дејност „Златен венец” и наградата „Браќа Миладиновци” која ќе се додели за најдобра поетска книга на македонски јазик.

Манифестацијата ќе трае се до 28 август, кога во Друштвото на писатели на Македонија добитникот на „Златен венец” ќе биде прогласен за почесен член на македонската поетска асоцијација.