Од сценаристот на „Топ ган”, „Вулверин” и „Турист” доаѓа возбудливата приказна за Џек Ричер (Том Круз), поранешен мајор на Воениот полициски корпус на Америка, човек кој не можете да го пронајдете, освен ако самиот не посака да биде пронајден.

Џек Ричер е лик од серијата книги на британскиот автор Џим Грант, а  динамичниот трилер е снимен според книгата „Еден истрел” од истоимениот автор.

Приказната започнува со бруталното убиство на пет случајни жртви од страна на поранешен снајперист, кој откако ќе биде фатен, од полицијата ќе побара да го пронајдат Џек Ричер.

Она што на изглед беше злосторство без никаква причина,  ќе се покаже како добро смислена игра за нечија цел, а токму Џек Ричер ќе се обиде да дојде до вистината и да застане во одбрана на правдата.

Двочасовната авантура на Ричер ќе ве поведе во потрага по вистината и ќе ви покаже дека законот има граници, но некои луѓе, токму како Ричер, не потклекнуваат пред тие граници.

Режисерот, а воедно и сценарист, Кристофер МекКери, создаде навистина интересен трилер, собра одлична актерска екипа (Роберт Дувал, Ричард Џенкинс) и оживеа нов херој, па не е чудно ако филмот добие и продолженија.

Критиките за Jack Reacher се поделени, но сите се согласуваат во едно: филмот е надпросечен трилер и можеби на повидок е нов јунак кој ќе постигне успех сличен на оној на Џејсон Борн.