Животен стил
Како најдобро да го започнете денот?
Постојат непишани утрински правила и ритуали по кои одредени личности се раководат, со цел убаво да им тргне денот и колку што е можно поуспешно да можат да се справат со секојдневниот стрес и обврски. На повеќето од луѓето кои ги практикуваат тие правила, веќе им се навики и без нив не можат да замислат да го започнат денот.
Викаат дека по утрото денот се познава, па ако и вие сте приврзаници на оваа мисла која е сосема вистинита и ако сакате со леснотија и без никакви маки и грижи да се справите со стресот и ситуациите кои ги носи животот и секојдневието, ви препорачуваме да започнете да практикувате дел од овие неколку совети кои ќе го разубават вашиот ден.
- Музиката е лек за душата и веќе е докажано дека го намалува стресот и има позитивно дејство врз здравјето на луѓето.
Наместете алармот на вашиот мобилен телефон да заѕвони со некоја ваша омилена песна која ви предизвикува пријатни чувства и убави спомени.
Додека се спремате за претстојниот работен ден исполнет со работни обврски, цело време слушајте музика. Ќе бидете исполнети со позитивна енергија и ќе бидете многу смирени. На овој начин ќе бидете подготвени успешно да се справите со работните обврски.
- Утринското туширање е нешто кое треба секој да го практикува бидејќи се ослободуваат сите мускули на телото и многу полесно човек може да се истегне под млазот топла вода. Со истегнувањето се ослободува целата насобрана напнатост, телото се опушта и се спрема за секојдневните обврски.
- Подгответе си здрав и урамнотежен појадок. Како најважен оброк во денот, појадокот треба да е составен од протеини и овошје, кои на организмот ќе му дадат доволна енергија за соочување со физичкиот и психичкиот стрес во текот на денот. Со правилно комбиниран појадок се регулира и нивото на шеќер во крвта. Избегнувајте за појадок да внесувате т.н. празни калории и кофеин.
- Подгответе си се зелен чај наместо кафе. Со чајот ќе ги добиете истите резултати како кафето, исто брзо ќе се расоните и ќе бидете подготвени за справување со обврските. Овој чај е богат со антиоксиданси, па истовремено со неговото консумирање и ќе се грижите за вашето здравје.
- Испланирајте си утринска прошетка која ќе го загрее и подготви вашето тело за активностите кои ви претстојат во текот на денот.
Знаеме дека шетањето е многу здраво и дека позитивно делува на многу полиња од животот, па затоа практикувајте да шетате колку што е можно повеќе, особено во раните утрински часови.
- Практикувањето на јога вежби на утро е најдобриот начин за здраво да го започнете секој нов ден. Почнете со благи вежби за истегнување и пробајте да медитирате неколку минути. Ќе бидете изненадени од позитивниот ефект кои овие јога вежби ќе го имаат по однос на вашето расположение во текот на денот и здравјето.
Со овие едноставни и лесни утрински навики, дозволете со вас да завладеат позитивното размислување, смиреноста и опуштеноста бидејќи токму тие нешта ќе ви бидат потребни за успешно да се справите со дневните обврски и задачи.
На утро дозволете си работи кои ве прават среќни, расположени и весели.
Додади коментар